Баранавічы: мітынг забаронены з-за наяўнасці ў заяўніка адміністрацыйнага спагнання
Баранавіцкі прадпрымальнік і грамадскі актывіст Мікалай Чарнавус 7 лютага атрымаў ліст за подпісам намесніка старшыні Баранавіцкага гарвыканкама Дз. Касцюкевіча, у якім паведамляецца, што гарвыканкам не дае згоды на правядзенне мітынга 12 лютага. У лісце з гарвыканкама гаворыцца, што “асобы, якія дапусцілі парушэнне парадку арганізацыі ці правядзення масавага мерапрыемства на працягу 1 года пасля накладання адміністрацыйнага спагнання за такое парушэнне, не могуць выступаць арганізатарамі масавых мерапрыемстваў.”
– Мне забаранілі мітынг у сувязі з тым, што 19 лістапада 2012 года судом Баранавіцкага раёна і горада Баранавічы я быў прыцягнуты да адміністрацыйнай адказнасці па артыкулу 23.34 ч.2 КаАП за арганізацыю дабрачыннага абеду на Баранавіцкім каапрынку, – паведаміў Мікалай Чарнавус.
Нагадаем, 12 лютага Мікалай Чарнавус і баранавіцкія прадпрымальнікі хацелі правесці мітынг, каб выказаць свой пратэст супраць падвышэння падаткаў, якія робяць прадпрымальніцкую дзейнасць бесперспектыўнай і стратнай.
