Жыхары Баранавічаў збіраюць подпісы за павышэнне мінімальнага заробку і пенсій
140 жыхароў горада Баранавічы паставілі свае подпісы пад заявай у Адміністрацыю прэзідэнта і Міністэрства працы і сацыяльнай абароны. Яны просяць павысіць узровень мінімальнага заробку і пенсіі да 2,5-3 мільёнаў рублёў.
– Зараз мы жывёць на 1,5 – 2 мільёна рублёў і, зразумела, пражыць на такія грошы сёння практычна немагчыма, бо кошты ўсё растуць і растуць, – гаворыць жыхарка горада Алена Кузьміч.
– Людзі хочуць, каб пенсіі і заробкі павялічваліся не толькі перад прэзідэнцкімі ці парламенцкімі выбарамі. Мы хочам прыцягнуць увагу кіраўніцтва краіны, што сёння і на 3 мільёны пражыць вельмі цяжка. Таму просім, як мага хутчэй, разглядзець нашу ініцыятыву і павысіць узровень мінімальнага заробку і пенсіі, – падкрэсліў ініцыятар заявы грамадскі актывіст Рыгор Грык.
