Болей «Славянскіх маршаў» у Магілёве не будзе?

Магілёўскія ўлады не дазволілі пікет арганізатару “Славянскага маршу” Дзмітрыю Дзенісенка.

Хлопец запланаваў яго правесці яшчэ 20 студзеня. Праз пікет ён хацеў выказаць пратэст супраць палітычна замоўленых пераследаў прадстаўнікоў грамадска-палітычных сілаў Беларусі.

Падчас правядзення мерапрыемства Дзенісенка планаваў выкарыстоўваць сцягі і плакаты грамадска-палітычнай скіраванасці, а таксама іконы Анастасіі Вызваліцельніцы і Божай Маці.

Нагадаем, што 25 лістапада 2012 года ў Магілёве адбыўся “Славянскі марш”. У ім прынялі ўдзел каля 40 чалавек. Падчас шэсця, якое адбывалася ўздоўж вуліцы Чалюскінцаў, моладзь выкрыквала прарасійскія лозунгі “Рускіе вперёд!” і “Слава Росіі!”.

Адразу пасля маршу міліцыянты завялі на Дзенісенку адміністрацыйную справу за парушэнне ўстаноўленага парадку арганізацыі альбо правядзення пасяджэння, мітынга, альбо вулічнага шэсця – некалькі прысутных удзельнікаў хавалі свае твары за маскамі. 16 студзеня суд прысудзіў яму штраф у памеры трох мільёнаў рублёў.

У судзе Дзенісенка віны не прызнаў і адзначыў, што працэс над ім палітычны.

На думку панславяніста, правядзенне “Славянскага маршу” у Магілёве напалохала ўладу, а каб пазбегнуць народных хваляванняў пасля вынясення яму несправядлівага выраку, Магілёўскі гарвыканкам 20 студзеня быў узяты пад узмоцненую ахову – каля будынка стаяла некалькі аўтазакаў, сцягнутыя дадатковыя сілы міліцыі і дзяжурыла машына хуткай дапамогі.