Бабруйск: Распранальні на Вадохрышча – толькі для міліцыі
У гэтым годзе ў Бабруйску купель для апускання ў Бярэзіну на Вадохрышча была арганізаваная не самым лепшым чынам. Не было сходняў, насціла з саломы, распранальні. Іардань была размешчана ля лодачнай станцыі, гэта дазволіла пераапрануцца ў службовых памяшканнях... толькі міліцыянтам.
- Я чуў, як некаторыя жанчыны прасіліся ў супрацоўнікаў лодачнай станцыі, каб іх пусцілі перапрануцца. Але ім адмовілі. Калі з будынка пачалі выходзіць мужчыны ў “купальных касцюмах”, людзі пачалі пытаць, хто гэта, і чаму ім дазволілі пераапрануцца ў камфортных умовах. Аказалася, гэта былі супрацоўнікі міліцыі, якія пажадалі ў гэты дзень акунуцца ў раку, - кажа бабруйчанін Аляксей.
У мінулым годзе на гэтым жа месцы была ўстаноўлена агульная распранальня, з абагрэвам. Чаму зараз нехта палічыў, што камфортных умоваў дастойныя толькі супрацоўнікі міліцыі, бабруйчане не могуць зразумець.
