У Баранавічах пікет 19 снежня забаронены

Старшыня Баранавіцкай філіі Аб’яднанай грамадзянскай партыі Анжаліка Камбалава 15 снежня атрымала ліст з гарвыканкама за подпісам намесніка старшыні гарвыканкама Дз. Касцюкевіча, у якім паведамляецца, што гарвыканкам не дае згоды на правядзенне пікета 19 снежня. У адказе адзначаецца, што заяўніца парушыла пункт 4 рашэння Баранавіцкага гарвыканкама “Аб парадку правядзення масавых мерапрыемстваў у горадзе Баранавічы” (у рэдакцыі рашэння Баранавіцкага гарвыканкама ад 05.10.2009г. № 2497). Сама спадарыня Камбалава паведаміла, што заключыла дамовы з гарадской паліклінікай і ЖКГ па абслугоўванню масавага мерапрыемства ў старым парку горада. Аднак з-за бюракратычнай цяганіны яна не змагла заключыць такую ж дамову з ГАУС, што і стала, магчыма, галоўнай прычынай забароны пікета 19 снежня.

– Мы хацелі патлумачыць жыхарам нашага горада прычыны пагаршэння сацыяльна-эканамічнага становішча ў нашай краіне і паведаміць ім, што грамадства сёння не мае магчымасці кантраляваць чыноўніцкую “непразрыстую” прыватызацыю дзяржаўнай маёмасці. Мы таксама планавалі акцэнтаваць увагу людзей на тым, што без справядлівых і свабодных выбараў негатыўныя працэсы ў эканоміцы будуць павялічвацца, а жыццё людзей пагаршацца, – адзначыла Анжаліка Камбалава.