У Брэсце прэзентавалі кнігу, прысвечаную бяспецы журналісцкай працы (фота)

Выданне мае назоў “У зоне рызыкі” і надрукавана пры дапамозе Міжнароднай федэрацыі журналістаў.

У кнізе разгледжаны практычныя і юрыдычныя аспекты журналісцкай бяспекі, прыведзены парады спецыялістаў у галіне права і псіхалогіі, а таксама высновы саміх журналістаў, якія тычацца выпадкаў, калі ўзнікаюць небяспечныя сітуацыі. Размова ідзе пра пагрозы журналістам, іх затрыманні падчас выканання прафесійных абавязкаў, замахі на асобу і маёмасць прадстаўнікоў СМІ.

У прэзентацыі браў удзел адзін з аўтараў выдання, намеснік старшыні ГА “БАЖ” Андрэй Бастунец. Акрамя разгляду канкрэтных сітуацый, удзельнікі сустрэчы (а гэта журналісты мясцовых выданняў, а таксама фрылансеры) убачылі фрагменты фільма, дзе асвятлялася дзейнасць фотарэпарцёраў, і абмеркавалі найбольш набалелыя праблемы, з якімі зараз сутыкаюцца тыя, хто робіць фота- і відэаматэрыялы.