viasna on patreon

Мікалая Дзядка перавядуць у турму

2012 2012-12-04T13:19:44+0300 1970-01-01T03:00:00+0300 be

4 снежня адбылося выязное паседжаньне Шклоўскага суду па справе зьняволенага анархіста Мікалая Дзядка. Суд пастанавіў накіраваць палітвязьня ў турму.

Пра гэта паведаміў бацька Мікалая Аляксандар Дзядок са спасылкай на адкавата, які прысутнічаў на судовым паседжаньні.

Бацька палітвязьня Аляксандар Дзядок, былы судзьдзя Менскага абласнога суду, кажа: у сына ўжо 22 спагнаньні за розныя парушэньні дысцыпліны, і адмысловая камісія ў калёніі выказалася за накіраваньне Мікалая Дзядка ў «крытую» турму.

«Усе гэтыя нібыта парушэньні тлумачацца адным — што сын адмаўляецца падпісваць прашэньне пра памілаваньне і трымаецца па-ранейшаму мужна і прынцыпова, не скараецца», — казаў Аляксандар Дзядок раней у інтэрвію «Свабодзе».

Актывіст анархісцкага руху Мікалай Дзядок у 2011 годзе быў асуджаны на 4,5 года зьняволеньня за хуліганства і пашкоджаньне маёмасьці падчас акцыяў каля Міністэрства абароны, на тэрыторыі расейскай амбасады, ізалятара на Акрэсьціна ды іншых. У зьняволеньні Мікалай Дзядок яшчэ мусіць адбыць больш за 2 гады.

У «крытых» турмах зараз знаходзяцца палітвязьні Мікалай Аўтуховіч, Мікалай Статкевіч, Зьміцер Дашкевіч, Яўген Васьковіч.

 

Апошнія навіны

Партнёрства

Сяброўства