Уладзіміра Кацору зноў рэабілітаваў Камітэт ААН
2 лістапада бягучага года Камітэт ААН па правах чалавека прызнаў, што ўлады Беларусі парушылі правы гомельскага грамадзкага ды палітычнага актывіста Уладзіміра Кацоры, переследваючы яго адміністрацыйнымі арыштамі за арганізацыю у абласным цэнтры мірных сходаў. За апошнія 5-6 гадоў спадар Кацора быў вымушаны за сваю дзейнасць правесці за кратамі каля 57 сутак арыштаў. За кратамі, у знак пратэстаў спадар Кацора неаднойчы быў вымушаны трымаць галадоўкі.
Нагадаем, у красакавіку 2006 года спадар Кацора спрабаваў арганізаваць у Гомелі мітынг, прысвечаны 20-ці годдзю аварыі на Чарнобыльскай АЭС і з гэтай мэтаю распаўсюдзіў друкаваныя улёткі. За гэта суддзя суду Чыгуначнага раёну Гомеля Віталь Козыраў “адмераў” яму 10 сутак адміністрацыйнага арышту. У лютым 2008 года спадар Кацора з’яўляўся арганізатарам сустрэчы жыхароў Гомелю з экс-кандыдатам на прэзыдэнта Аляксандрам Мілінкевічам. За гэта старшыня суду Савецкага раёну Гомеля Аляксандр Кострыкаў прысудзіў яму 7 сутак арышту.
Прайшоўшы усе
унутраныя сродкі прававой абароны Уладзімір Кацора звярнуўся у Камітэт ААН па
правах чалавека, дзе палічылі, што пераследуючы свайго грамадзяніна ў
адміністрацыйным парадку за распаўсюд інфармацыі аб маючых адбыцца мірных
сходах дзяржава парушае яго правы, замацаваныя у артыкулу 19 Міжнароднага пакту аб грамадзянскіх і палітычных правах.
На падставе рэкамэндацый
Камітэту ААН урад Беларусі мусіць забяспечыць «ахвяры парушэння
эфэктыўны
сродак прававой абароны, уключна з поўным пакрыццём выдаткаў і належнай
кампэнсацыяй», а таксама абавязаны «не дапускаць падобных парушэньняў
у будучыні».
На думку юрыста і праваабаронцы Леаніда Судаленкі, які дапамагаў ахвяры рыхтаваць скаргі дзяржаўныя чыноўнікі і судзьдзі, караючы актывістаў забываюць пра міжнародныя абавязаньні краіны:
“Дзяржаўныя чыноўнікі забываюць, што апрача закону пра масавыя мерапрыемствы наша краіна мае яшчэ і міжнародныя абавязкі. Нацыянальнае заканадаўства супярэчыць міжнародным пагадненням нашай краіны, пра гэта ужо неаднойчы казалі міжнародныя эксперты. І суды, і чыноўнікі не выконваюць гэтых міжнародных пагадненьняў” – падкрэсліў праваабаронца.
Нагадаем, што летась Камітэт ААН па правах чалавека прызнаў незаконнай канфіскацыю у спадара Кацоры падчас парламентских выбараў 2004 года перадвыбарчых улетак “V – плюс”. Таксама Уладзімір Кацора атрымаў перамогу над дзяржаваю у справе адмовы дзяржаўнай рэгістрацыі створанага у Гомелі абласнога грамадскага аб’яднання “ Грамядзянская альтэрнатыва”.
