У Свіслачы - штрафы ў 10 базавых велічынь
У Свіслацкім раённым судзе 27 лістапада адбыўся разгляд трох адміністратыўных пратаколаў, складзеных у дачыненні да мясцовых грамадскіх актывістаў за ўдзел у святкаванні Дня памяці паўстанцаў 1863 году, якое адбылося яшчэ 27 кастрычніка.
Першым быў аштрафаваны паэт Анатоль Валюк. Суддзя Жана Салагубік, якая вяла працэс, адмовіла яму ў выкліку сведкаў на той падставе, што яны таксама праходзяць па аналагічнай справе як абвінавачаныя. Відэазапіс, які вяла міліцыя ў дзень акцыі памяці, на судзе ў гэты раз прадэманстраваць не змаглі. Анатоль Валюк сцвярджае, што яго на відэаздымцы ўвогуле не было – па-сутнасці яго аштрафавалі за прысутнасць у гэты дзень у райцэнтры.
Пасля суддзя Салагубік імкліва разгледзела яшчэ два аналагічныя пратаколы – кіраўнік свіслацкай суполкі БСДГ Віктар Дзесяцік і сябра асветніцкага грамадскага аб’яднання “Фонд імя Льва Сапегі” Юрый Глебік таксама былі аштрафаваныя на 10 базавых велічынь.
