Міжнародная Хельсінкская Федэрацыя прыняла заяву ў сувязі з высяленьнем БХК з офісу

Упраўленьне справамі Прэзідэнта Рэспублікі Беларусь апавясьціла РГА “Беларускі Хельсінкскі Камітэт” (БХК), сябру Міжнароднай Хельсінскай Федэрацыі па Правах Чалавека (МХФ), пра скасаваньне бестэрміновай дамовы арэнды офіса Камітэта і запатрабавала вызваліць памяшканьне.

Амаль усе офісныя будынкі ў Беларусі знаходзяцца ў распараджэньні Упраўленьня справамі Прэзідэнта, і НДА павінны “узгадняць” месца свайго разьмяшчэньня з уладамі. Страта юрыдычнага адрасу недзяржаўнай арганізацыяй можа прывесьці да яе ліквідацыі як юрыдычнай асобы.

БХК ня мае запазычанасьці па аплаце арэнднай платы і ў адпаведнасьці з законам мае пераважнае права на падаўжэньне або перазаключэньне дамовы арэнды таго самага памяшканьня. Больш за месяц Камітэт спрабаваў абараніць офіс, у якім ён зарэгістраваны і дзе аказвае прававую дапамогу насельніцтву з 1998 года, аднак посьпехаў не было, нягледзячы на тое, што ў гэтым і іншых будынках ёсьць вольныя памяшканьні.

У адмыслова прынятай заяве Міжнародная Хельсінкская Федэрацыя называе нежаданьне арэндадаўцы падоўжыць дамову “палітычна матываваным” і заклікаюць улады падоўжыць арэнду.