Парычы: вярнуць дзяцей у сям'ю
600 подпісаў у падтрымку шматдзетнай маці, у якой адабралі 5 прыёмных дзяцей, сабрала міжнароднае грамадскае аб’яднанне “Добрая воля”.
Калектыўны зварот будзе накіраваны ў Гомельскі абласны выканаўчы камітэт, Савет міністраў і Адміністрацыю прэзідэнта. На думку старшыні ГА “Добрая воля” Леаніда Скарабагатага, шанец, што дзяцей вернуць у сям’ю, яшчэ застаецца:
- Калектыўныя звароты грамадзян разглядаюцца з выездам на месца. Мы будзем прасіць, каб выязджала абласная адміністрацыя і камісія з Мінска і разглядалі справу на месцы. Калі яны будуць разглядаць справу ў Мінску, то дадуць адпіску. Яны ўжо зубы з'елі на адпісках. Але калі яны прыедуць і збяруцца жыхары Парычаў на разгляд гэтай справы, то ёсць шанец на тое, што ўсё будзе так, як трэба.
Збор подпісаў працягваецца на сайце арганізацыі “Добрая воля”. 5 прыемных дзяцей былі забраны з сям’і Надзеі Дударэнкі з Парычаў (Светлагорскі раён) пасля яе скаргі, што настаўніца б'е дзяцей у школе.
