Слонім: творчая інтэлігенцыя просіць паспрыяць у адкрыцці беларускіх школ

Слонімскі пісьменнік Аляксей Якімовіч пачаў збор подпісаў сярод творчай інтэлігенцыі Слонімшчыны пад адкрытым зваротам на імя старшыні Слонімскага райвыканкама Іосіфа Паўлюкевіча. У лісце гаворыцца, што “называцца беларусамі і быць імі – не адно і тое ж. Хіба можна спакойна спаць, калі знікае наш духоўны скарб – мова? Без яе няма шляху ў годнае, прыгожае заўтра. Нашы дзеткі, не чуючы і не мовячы слова па-беларуску, вырастаюць безаблічнымі, нібы шэрыя слупы… “.

Таму творчая інтэлігенцыі просіць спадара Паўлюкевіча “паспрыяць таму, каб у Слоніме і раёне адкрыліся новыя беларускамоўныя школы, класы, садкі, каб нашым дзеткам пачаць шлях да крынічнага, чароўнага слова зямлі, на якой мы жывём”.

Прадстаўнікі творчай інтэлігенцыі Слонімшчыны актыўна ставяць свае подпісы. У лістапададзе адкрытае пісьмо будзе перададзена ў Слонімскі райвыканкам.