У 2006 годзе ў Беларусі адбылося больш за 400 агітканцэртаў за Лукашэнку

Мінулы год быў паспяховым для культуры краіны. Практычна ўсе калектывы, у тым ліку рэспубліканскія, абласныя, раённыя, прынялі актыўны ўдзел у акцыі “За сильную и процветающую Беларусь”, падчас якой адбылося больш за 400 канцэртаў. Пра гэта паведаміў у інтэрв’ю карэспандэнту БЕЛТА міністр культуры Рэспублікі Беларусь Уладзімір Матвейчук, які сёння прымае ўдзел у выніковай калегіі ўпраўлення культуры Гарадзенскага аблвыканкама.

Нагадаем, што дадзеныя канцэрты адбыліся ў Беларусі напярэдадні прэзідэнцкіх выбараў. У канцэртах, якія прайшлі па ўсёй краіне, бралі ўдзел не толькі беларускія, але і расейскія поп-выканаўцы. Падчас мерапрыемстваў ішла агітацыя за Аляксандра Лукашэнку, за што праваабаронцы і назіральнікі абвінавацілі ўлады Беларусі ў выкарыстанні адміністрацыйнага рэсурсу падчас перадвыбарнай кампаніі.