Аршанскі актывіст Сяргей Гумінскі прызнаны падозраным у дзяйсьненьні крымінальнага злачынства

Праваабарончаму цэнтру “Вясна” стала вядома, што моладзевы актывіст з Воршы Гумінскі Сяргей 22 студзеня быў зноў дапытаны ў якасьці падазраванага па крымінальнай справе за нанясеньне палітычных графіці па арт. 341 КК РБ. У аддзяленьні міліцыі яму афіцыйна была ўручана пастанова аб гэтым. У ёй таксама напісана, што “Гумінскі Сяргей уначы з 23 на 24 сьнежня 2006 г. з мэтай апаганьваньня будынку на сцяне д.57 па вул. Леніна ў Оршы выканаў надпіс цынічнага зьместу”.

Нагадаем, што Сяргея Гумінскага 24 сьнежня ўжо дапытвалі па гэтай справе, у ягонай кватэры былі праведзеныя некалькі вобыскаў. 10 студзеня на допыце ў Аршанскім ГАУС ён быў жорстка зьбіты супрацоўнікамі міліцыі за прынцыповае карыстаньне беларускай мовай, пасьля чаго зьвярнуўся са скаргаю ў пракуратуру на дзеяньні міліцыі. 12 студзеня моладзевага актывіста зноў выклікалі ў міліцыю, дзе на яго склалі пратакол па арт. 156 і 166 КаАП, а суд пакараў яго 3-дзённым арыштам.