Зміцера Салаўёва больш за пяць гадзінаў правяралі на беларуска-польскай мяжы
Зміцер Салаўёў
Праваабаронца вяртаўся з Польшчы праз памежны пераход Пясчатка. Апоўначы пад'ехаў на беларускі бок, дзе мытнікі і памежнікі, а таксама два супрацоўнікі ў грамадзянскім, дэталёва пачалі правяраць ягоныя рэчы і аўтамабіль.
Па словах Салаўёва, аўтамабіль загналі на бокс, заглядвалі ва ўсе аддзелы, пад капот, дагледзелі нават днішча. У самім аўто цікавасць мытнікаў выклікаў плакат з выявай Алеся Бяляцкага, дыскі на тэму смяротнага пакарання і дапаможнік для назіральнікаў за выбарамі. "Мяне адпусцілі толькі ў 4 гадзіны раніцы. Усіх, хто стаяў у чарзе пасля мяне, даглядалі вельмі павярхоўна і хутка адпускалі. Акт дагляду і вымання не складалі, прычыны такога доўгага затрымання не тлумачылі. Усе асабістыя рэчы мне вярнулі", - адзначыў праваабаронца.
Нагадаем, што ўчора на беларуска-ўкраінскай мяжы мытнікі праводзілі асабісты агляд грамадскіх актывістаў Сержука Семенюка і Ірыны Смяян-Семянюк.
