У Пінску для недзяржаўнай грамадзка-палітычнай газеты “Мясцовы час” стала праблематычным атрыманьне інфармацыі ад супрацоўнікаў гарвыканкама і міліцыі

Дзяжурны міліцыянер Пінскага ГАУС на мінулым тыдні адмовіўся прадаставіць запатрабаваныя аператыўныя звесткі пра здарэнні ў горадзе рэдактару газеты Віктару Ярашуку.

Журналіст пасля інцыдэнту звярнуўся да начальніка штаба Пінскага ГАУС Міхаіла Цялушкі, каб высветліць прычыну адмовы і вырашыць пытанне магчымасці атрымліваць інфармацыю ў будучым. Аднак М.Цялушка без тлумачэння адказаў, што недзяржаўнай газеце інфармацыя больш прадастаўляцца не будзе.

Супрацоўнікі Пінскага гарвыканкама таксама адмаўляюцца даваць інфармацыю журналістам “Мясцовага часу”. У гарвыканкаме карэспандэнтам “МЧ” паведамілі, што яны цяпер атрымаць інфармацыю любой уласцівасці могуць толькі з пісьмовага дазволу старшыні выканкама альбо яго намеснікаў. Прычым адказ можна чакаць на працягу месяца з дня атрымання чыноўнікамі пісьмовага запыту.

Такі метад “узаемасупрацоўніцтва” журналістаў не задавальняе, паколькі губляецца аператыўнасць публікацый, паведаміў БАЖ.