Фарбы дзяцінства для Алеся Бяляцкага

Алесь часта піша, што атрымлівае вялікую колькасць паштовак, з пэўных нагодаў ці проста на знак салідарнасці, ад аддзяленняў Аmnesty Іnternational з розных краінаў – пераважна брытанскага, галандскага ды іншых. І ў адным з нядаўніх лістоў ён распавёў пра стракаты феерверк з паштовак ад галандскіх дзетак, якія афарбавалі ў эмацыйныя колеры яго будні за кратамі.

“Дарагі Алесь,
на гэтых выходных шмат дзецей зрабілі віншавальную паштоўку для цябе. Мы жадаем табе ўсяго найлепшага, і памятай: мы думаем пра цябе!”, - напісала Марыйка Дуселье, актывістка Аmnesty Іnternational з Эйндховена.

Алесь Бяляцкі атрымаў больш за 40 такіх паштовак-малюнкаў. І кожная з іх – гэта шчыры і непасрэдны водгук дзіцячай душы на гісторыю пра аднаго чалавека, які ахвяруе ўласнай свабодай дзеля роўнасці, свабоды, справядлівасці і павагі для ўсіх.