Слуцк: кандыдат просіць узбудзіць крымінальную справу ў дачыненні да выбаршчыка
Аляксандр Шыловіч
Кандыдат па Слуцкай выбарчай акрузе № 67 Аляксандр Шыловіч лічыць, што паклёп і абразы ў яго адрас гучалі на двух сустрэчах з выбаршчыкамі. Аўтар абразлівых рэплік - яго былы начальнік Уладзімір Пратасеня.
На сустрэчы, якая праходзіла ў доме культуры моладзі 12 верасня, экс-шэф Шылавіча публічна назваў яго злодзеем і крымінальнікам. Праз два дні на сустрэчы ў Слуцкай цэнтральнай раённай бібліятэцы Уладзімір Пратасеня заявіў, што кандыдат ні аднаго дня ў сваім жыцці не працаваў, і ў яго няма працоўнай кніжкі.
«Сваімі дэструктыўнымі паводзінамі гэты чалавек ператварае маю агітацыю ў фарс», - упэўнены Аляксандр Шыловіч.
Кандыдат звярнуўся ў Слуцкі РАУС з заявай, у якой просіць міліцыю правесці расследаванне, узбудзіць крымінальную справу па артыкуле 188 Крымінальнага кодэкса і абмежаваць доступ Пратасені на яго сустрэчы з выбаршчыкамі.
18 верасня былы начальнік з'явіўся на чарговым публічным выступе Аляксандра Шыловіча, аднак ад рэзкіх словаў у яго адрас стрымаўся і пытанняў не задаваў.
«Праваабаронцы за свабодныя выбары»
