У Брэсце суд падтрымаў забарону пікету салідарнасці з палітвязнямі

Пікет меркавался правесці 4 жніўня – у гадавіну знаходжання за кратамі кіраўніка Праваабарончага цэнтра “Вясна” Алеся Бяляцкага, каб прыцягнуць увагу грамадскасці да праблемы палітзняволеных у Беларусі. Аднак Брэсцкі гарвыканкам забараніў акцыю, спаслаўшыся на тое, што заяўнікі не падпісалі дамовы з праваахоўнымі органамі, установай аховы здароўя і камунальнымі службамі.

Нязгодныя з такім рашэннем уладаў праваабаронца Уладзімір Вялічкін, кіраўнікі абласных структураў АГП Уладзімір Вуек і БСДП (Грамада) Ігар Маслоўскі накіравалі скаргу ў суд першай інстанцыі, але той пакінуў яе без задавальнення. Па словах Уладзіміра Вялічкіна, суд не прыняў да ўвагі, што рашэнне, на якое спасылаецца ў сваё адмове гарвыканкам, парушае правы грамадзян на мірныя сходы і не дае магчымасці публічна выказваць свае перакананні.