Выдадзены праваабарончы дапаможнік

Праваабарончы цэнтар “Мэмарыял”, які дзейнічае ў Маскве, выдаў навучальны дапаможнік “Зварот у Эўрапейскі суд па правох чалавека”. У кнізе, надрукаванай на расейскай мове, падрабязна распавядаецца аб працэдуры звароту ў міжнародную судовую інстанцыю. Гэты зборнік могуць атрымаць і праваабаронцы ў нашай краіне. У якіх выпадках і як чалавек можа зьвярнуцца ў Эўрапейскі суд – гэтай тэме прысвечаныя мэтадычныя і дакумэнтальныя матэрыялы, зьмешчаныя ў кнізе. Першапачаткова выданьне распаўсюджвалася ў Расейскай Фэдэрацыі. Цяпер маскоўскі праваабарончы цэнтар мае магчымасць перасылаць гэтыя кнігі і ў Беларусь, паведаміла супрацоўніца “Мэмарыялу” Марына Функ. Па дадатковую інфармацыю аб дапаможніку можна зьвярнуцца на адрас funk16@mail.ru . На меркаваньне выдаўцоў дапаможніка, кніга адрасаваная найперш грамадзкім праваабарончым аб’яднаньням. Аўтары кнігі спадзяюцца, што выданьне будзе карысным для юрыстаў, якія займаюцца пытаньнямі абароны правоў чалавека. Матэрыялы, якія змешчаныя ў кнізе, могуць быць актуальнымі таксама для навукоўцаў і выкладчыкаў у галіне правазнаўства,-паведамляе www.belngo.info.