12 снежня ў Берасці быў затрыманы аўтамабіль з апазіцыянерамі

У 20 гадзін 30 хвілін 12 снежня 2006 году на вуліцы Асіпенка побач з домам № 23 у Берасці міліцэйскай машынай быў спынены і заблякаваны аўтамабіль у якім знаходзіліся Юрась Губарэвіч, старшыня Брасьцейскай абласной арганізацыі Партыі БНФ, Зьміцер Шыманскі, старшыня Брасьцейскай гарадзкой арганізацыі Партыі БНФ, Сяргей Ермакоў, сябра партыі БСДГ, маладзёвыя актывісты Андрэй Шарэнда і Алена Дземідовіч.

Затрыманым патлумачылі, што паступіў сігнал аб тым, што яны перавозяць скрыні з цыгарэтамі, а таму трэба правесьці агляд аўтамабіля на прадмет выяўленьня гэтых скрыняў. Дзеля гэтага іх папрасілі праехаць у Ленінскі РАЎС. Затрыманыя патрабавалі, каб агляд правялі на месцы.

Агляд аўтамабіля праводзіла ст.л-т Алена Денісенко. Былі дагледжаныя аўтамабіль і асабістыя рэчы Юрася Губарэвіча, аб чым быў складзены пратакол.

“Я лічу, што дадзеныя “сьледчыя дзеяньні” носяць прафіляктычна-прэвентыўны характар і мелі на мэце запабегчы сустрэчы 5 вышэйзгаданых Берасьцейскіх апазыцыянэраў напярэдадні выбараў,” – гаворыць берасцейскі праваабаронца Уладзімір Вялічкін.