У Адміністрацыю прэзідэнта перадалі петыцыю з патрабаваннем вызваліць праваабаронцу Алеся Бяляцкага і ўсіх палітвязьняў
Фота Радыё Свабода
Прадстаўнікі няўрадавых дэмакратычных арганізацый, грамадскія дзеячы і праваабаронцы Беларусі напярэдадні Міжнароднага Дня салідарнасці з грамадзянскай супольнасцю і праваабарончым рухам Беларусі, які будзе ўпершыню адзначацца 4 жніўня, перадалі ў Адміністрацыю прэзідэнта Аляксандра Лукашэнкі Петыцыю да ўладаў Беларусі з патрабаваннем неадкладнага і безумоўнага вызвалення Алеся Бяляцкага і ўсіх палітвязняў, якія дагэтуль знаходзяцца ў турмах, а таксама спынення ціску на праваабарончыя і грамадскія арганізацыі краіны.
Сярод іх прадстаўнікі Праваабарончага цэнтру “Вясна” Беларускага Хельсынскага камітэту, Цэнтра па правах чалавека і іншых праваабарончых арганізацый, Беларускай асацыяцыі журналістаў, а таксама грамадскі дзеяч і палітык Аляксандар Мілінкевіч.
Праваабарончы цэнтр “Вясна” таксама звярнуся да калегаў, прадстаўнікоў міжнародных і беларускіх праваабарончых арганізацый, з заклікам правесці ў гэты дзень акцыі салідарнасці з Алесем Бяляцкім - старшынёй Праваабарончага цэнтру “Вясна” і віцэ-прэзідэнтам Міжнароднай федэрацыі за правы чалавека (FIDH), які быў арыштаваны 4 жніўня 2011 г. і асуджаны да чатырох з паловай гадоў пазбаўлення волі за актыўню праваабарончую дзейнасць.
