Жодзіна: праваабаронцы нагадалі ўладам пра Канстытуцыю й зьвярнуліся ў суд са скаргаю
У Жодзінскім судзе вызначаюць памер дзяржпошліны для аплаты пры падачы скаргі А. Лапіцкім.
Праваабаронца Аляксей Лапіцкі 30 ліпеня зарэгістраваў у Жодзінскім гарвыканкаме новую заяву, у якой пастаўлены пытаньні да кіраўніцтва города, якое чарговы раз прадказальна забараніла замоўленае на 4 жніўня пікетаваньне ў падтрымку палітвязняў і пазбаўленага свабоды праваабаронцы Алеся Бяляцкага.
У заяве адзначаецца, што матывацыя забароны тым, што “пададзеныя дакумэнты не адпавядаюць патрабаваньням арт. 6 Закону Рэспублікі Беларусь «Аб масавых мерапрыемствах у Рэспубліцы Беларусь»” з прыпіскай аб тым, што “забесьпячэньне грамадзкага парадку й бясьпекі, а таксама мэдычнага абслугоўваньня ўдзельнікаў пікетаваньня ў часе правядзеньня масавага мерапрыемства павінна ажыцьцяўляцца ворганамі нутраных справаў і установай аховы здароўя насельніцтва” – незразумелая.
Праваабронца ў сваёй заяве тлумачыць падпісаўшаму забарону намесьніку старшыні выканкаму па ідэалёгіі Юрыю Шараму, што “ў сваіх пісьмовых гарантыях да заяўкі на правядзеньне … малога пікетаваньня (колькасьцю 1-2 асобы, верагодна да 10 максымум)” заяўнікі адзначылі як яны з свайго боку “будуць выконваць уласныя абавязкі ў якасьці арганізатараў і ўдзельнікаў гэтага мірнага мерапрыемства, а таксама прапанавалі выканкаму й адпаведным, каардынуемым ім установам, выканаць сваю частку абавязкаў згодна Канстытуцыі (арт. 33 і арт. 35) і Міжнароднага Пакту (МПГіПП, арт. 19 і арт. 21) па гарантыях забесьпячэньня й аховы правоў і свабодаў” заяўнікоў і “падтрыманьня правапарадку ў часе правядзеньня мерапрыемства, калі яно будзе належным чынам дазволенае”.
Заяўнікі ў сваім звароце адзначаюць, што “ў мінулым судовым разьбіральніцтве” па падобнай праблеме “cудом выяўлены й вызначаныя ўмовы, пры якіх дадзеныя ўстановы аховы правапарадку й здароўя могуць рэагаваць на наўпростыя да іх звароты грамадзянаў”. Так “для таго, каб дадзеныя дзяржустановы выканалі свае непасрэдныя функцыі абавязковай і цалкам дастатковай умоваю зьяўляецца, як мінімум, дазвол правядзеньня мерапрыемства з боку выканкаму.”
У такіх умовах праваабаронцы прапануюць кіраўніцтву Жодзінскага гарвыканкаму усё ж падумаць і “адмяніць сваё рашэньне”, “задаволіць пададзеную заяўку на правядзеньне мірнага мерапрыемства ў адзначаны ў ёй дзень, час, у тым жа самым фармаце.”
Як паведамляе prava-by.info адначасова Аляксей Лапіцкі зарэгістраваў у Жодзінскім судзе скаргу на неправамерныя дзеяньні службовых асобаў Жодзінскага выканкаму, якімі парушаюцца Канстытуцыйна гарантаваныя грамадзянам Беларусі правы на свабоду перакананьняў, безперашкодны распаўсюд інфармацыі й правядзеньне мірных сходаў. Скаргу прынялі й зарэгістравалі ў канцэлярыі суда.
