viasna on patreon

Алена Захожая працягвае галадоўку

2006 2006-11-10T10:00:00+0200 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Актывістка Беларускага незалежнага прафсаюза, электраманцёр Алена Захожая 39-ы дзень праводзіць галадоўку пратэсту на бабруйскім прадпрыемстве "Белшына". Гэтымі днямі жанчына была выпісаная са шпіталю і ўжо другі дзень выходзіць на працу. Кіраўніцтва "Белшыны" не толькі не ідзе на саступкі галадоўшчыцы, але і прымушае яе выконваць дадатковую працу. "Сёння да мяне падыйшоў дырэктар Яўген Хвалько і заявіў, што мне, мабыць, мала прыходзіцца працаваць, і адправіў мыць абсталяванне. Зараз, калі я гэта раблю, стаю на каленях, бо ўжо зусім няма сіл. Стан жудасны. Усё баліць, але я не магу нават піць таблеткі. мне забаронена хадзіць за гарачай вадой, а халоднай вадой запіваць лекі я ўжо не магу. Ад боля гатовая біцца галавой аб сценку. Не думала я, калі чытала ў дзяцінстве кніжкі пра фашызм, што мне давядзецца сутыкнуцца з гэтым фашызмам насамрэч", – заявіла Алена Захожая ў інтэрв`ю прэс-цэнтру Хартыі`97.

Па словах прафсаюзнай актывісткі, не выключна, што кіраўніцтва прадпрыемства неўзабаве зволіць яе па артыкуле "службовая неадпаведнасць", паколькі яна з цяжкасцю ходзіць і ёй усё цяжэй працаваць. "Ім і так усім напляваць, што са мной будзе, чакаюць, пакуль памру, а калі звольняць, то яшчэ прасцей будзе – памру за варотамі завода і канец", – гаворыць Захожая.

Па словах жанчыны, галадоўку яна прыпыняць не збіраецца. Стан яе здароўя з кожным днём пагаршаецца. Па словах Алены Захожай, яе турбуе ціск, сэрца, ныркі. "Баліць насамрэч усё. Без лекаў ужо не магу трываць гэтага боля", – кажа Захожая.

Працаўнікі прадпрыемства жанчыну падтрымліваюць, як могуць. "Пакуль начальства не бачыць, нешта могуць за мяне зрабіць. Падтрымліваюць маральна…", – гаворыць жанчына.

Нагадаем, што актывістка першаснай арганізацыі Беларускага незалежнага прафсаюза (БНП) працаўнікоў "Белшыны" А.Захожая галадае з 3 кастрычніка. Яна патрабуе зарэгістраваць першасную арганізацыю БНП. Для гэтага неабходна, каб адміністрацыя ААТ "Белшыны" надала прафсаюзу юрыдычны адрас, аднак наймальнік адмаўляецца гэта рабіць. Акрамя таго, Захожая патрабуе выплаціць сябрам БНП прэміі і даплаты на аздараўленне, якія ўжо атрымалі астатнія працаўнікі прадпрыемства. 31 кастрычніка А.Захожая была дастаўленая ў бальніцу пасля таго, як страціла прытомнасць на працоўным месцы.

1-2 лістапада адбыліся перамовы паміж прадстаўнікамі БНП і кіраўніцтвам "Белшыны". Як паведаміў БелаПАН старшыня БНП Васіль Корабаў, бакі змаглі дасягнуць дамоўленасцяў па пытаннях выплаты прэмій і даплат на аздараўленне сябрам незалежнага прафсаюза. Аб рэгістрацыі арганізацыі БНП дамоўленасць не дасягнутая.

А.Захожая, у сваю чаргу, назвала вынікі перамоваў, якія адбыліся, "нулявымі".

Апошнія навіны

Партнёрства

Сяброўства