Баранавічы: грамадскага актывіста затрымалі як злачынцу
Баранавіцкі грамадскі актывіст Арцём Бабей
Моладзевы актывіст Арцём Бабей 3 ліпеня быў затрыманы ў Баранавічах у афіцыйнае свята Дзень незалежнасці.
– За мной сачылі яшчэ раніцай, але затрымалі каля маладога парку па вуліцы Камсамольскай падчас праходжання турнікету. Міліцыянеры сказалі, што я падобны да нейкага злачынцы, і павялі мяне ў пастарунак па вуліцы Камсамольская,- распавёў Арцём Бабей.
Да вобшуку і агляду рэчаў далучыўся маёр Кульгавік, які год таму падчас гутаркі папярэджваў актывіста пра недапушчальнасць удзелу ў маўклівых акцыях пратэсту. У пастарунку актывіста пратрымалі каля гадзіны і адпусцілі без складання пратаколу.
Сам маладзён выказаў меркаванне, што міліцыянеры затрымалі яго прэвентыўна, каб «часам не вывесіў якой-небудзь расцяжкі ў дзяржаўнае свята».
