Брэст: апазіцыя вылучае сваіх актывістаў у выбаркамы

У Брэсцкай вобласці апазіцыйныя партыі вылучылі 32 прадстаўніка ў акруговыя выбарчыя камісіі па выбарах дэпутатаў Палаты прадстаўнікоў.
Найбольшая колькасць вылучэнцаў належыць да Беларускай партыі левых “Справядлівы свет” - 13 чалавек, з якіх чатыры вылучаныя ў абласным цэнтры. Па восемь сваіх сябраў вылучылі мясцовыя суполкі Партыі БНФ (з іх 2 – у Брэсце) і Аб'яднанай грамадзянскай партыі (5 – у Брэсце), а тры актывіста прадстаўляюць Беларускую сацыял-дэмакратычную партыю (Грамада), з якіх два вылучаюцца ў горадзе над Бугам.

Варта адзначыць, што згаданыя партыі разам з шэрагам іншых дэмакратычных грамадскіх аб'яднанняў стварылі ў рэгіёне абласны савет кампаніі “За справядлівыя выбары”. Заснавальнікі гэтай структуры абвесцілі, што маюць намер вылучыць не менш за 100 прадстаўнікоў кампаніі ў выбарчыя камісіі ўсіх узроўняў, а таксама не менш за 400 назіральнікаў за выбарамі.

"Праваабаронцы за свабодныя выбары"