viasna on patreon

Улады Брэста трымаюць у сакрэце змены ў рашэнне пра масавыя мерапрыемствы

2012 2012-06-27T15:15:24+0300 1970-01-01T03:00:00+0300 be https://spring96.org/files/images/sources/maslouski.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Прадстаўнік БХК па Брэсцкай вобласці Ігар Маслоўскі

Прадстаўнік БХК па Брэсцкай вобласці Ігар Маслоўскі

Брэсцкі аблвыканкам адказаў на зварот мясцовых праваабаронцаў, пад якім было сабрана каля 200 подпісаў з патрабаваннем змяніць рашэнне №1210 “Аб масавых мерапрыемствах у горадзе Брэсце” ад 30 чэрвеня 2011 года.

Як паведаміў прадстаўнік Беларускага Хельсінкскага Камітэту па Брэсцкай вобласці Ігар Маслоўскі, раней улады адмовіліся ўносіць новыя змены ў рашэнне №1210, нягледзячы на тое, што яно, на думку праваабаронцаў, парушае артыкул 35 Канстытуцыі і палажэнні Закона “Аб масавых мерапрыемствах”.

Напрыклад, рашэннем гарвыканкама вызначана, што пры падачы заявы аб правядзенні масавага мерапрыемства да яе неабходна прыкласці дамовы з органамі ўнутраных справаў, установай аховы здароўя і камунальным прадпрыемствам. Аплата па гэтых дамовах павінна быць праведзена не пазней, чым за дзень да пачатку мерапрыемства. У выпадку невыканання дадзеных патрабаванняў дазвол на правядзенне масавага мерапрыемства анулюецца.

Аўтары звароту сцвярджаюць, што ў гэтай частцы рашэнне №1210 парушае артыкул 10 Закона “Аб масавых мерапрыемствах”, дзе гаворыцца, што аплата пералічаных паслуг павінна быць праведзена не пазней за 10 дзён пасля правядзення мерапрыемства. Заяўнікі акцый неаднаразова беспаспяхова спрабавалі заключыць дамовы з дадзенымі структурамі, аднак там адмаўляліся рабіць гэта, спасылаючыся на адсутнасць практыкі заключэння такіх дамоваў і ўказанняў вышэйстаячых арганізацый. У сваю чаргу Брэсцкі гарвыканкам забараняў заяўнікам мерапрыемствы на той падставе, што да заяўкі не прыкладзены дакументы аб адпаведных дамовах.

У атрыманым адказе з аблвыканкаму сцвярджаецца, што рашэнне №1210 ўключана ў Нацыянальны рэестр прававых актаў на падставе заключэння галоўнага ўпраўлення юстыцыі аблвыканкама аб адпаведнасці яго Канстытуцыі, дзеючым нарматыўным прававым актам і міжнародным дамовам Беларусі.

“Таксама нам паведамілі, што ў пункт 6 гэтага рашэння 9 студзеня 2012 года гарвыканкамам былі ўнесены змены. Як мы зразумелі, размова ідзе пра тое, што аплочваць паслугі па ахове грамадскага парадку, медыцынскім абслугоўванні, уборцы тэрыторыі з 9 лютага ўжо трэба пасля масавага мерапрыемства, а не напярэдадні”, - распавёў Ігар Маслоўскі.

Між тым, пра змены ў рашэнне гарвыканкама № 210 “Аб масавых мерапрыемствах у горадзе Брэсце” жыхары абласнога цэнтра не ведаюць, бо нават на афіцыйным сайце Брэсцкага гарвыканкама дадзенае рашэнне размешчана без зменаў і дадаткаў. “Я не выключаю, што новая рэдакцыя пункта 6 магла з'явіцца пасля таго, як брэсцкія актывісты БХК пачалі ў горадзе кампанію “Стоп 1210, або Права на мірныя сходы”, - кажа праваабаронца. - Але спыняць гэтую кампанію мы не будзем, бо праблема існавання дамоваў заяўнікамі акцый па-ранейшаму не вырашана і ўлады на гэтай падставе забараняюць усе масавыя мерапрыемствы, заяўленыя дэмакратычнымі актывістамі”.

Апошнія навіны

Партнёрства

Сяброўства