Суддзя Алена Сямак не знайшла часу разгледзець скаргу “невыязнога” праваабаронцы Стэфановіча і сыйшла ў адпачынак
Намеснік старшыні ПЦ “Вясна” Валянцін Стэфановіч (фота svaboda.org)
Больш за тры месяцы намеснік старшыні ПЦ “Вясна” Валянцін Стэфановіч чакае прызначэння даты разгляду скаргі ў судзе Цэнтральнага раёна Менска на дзеянні Міністэрства абароны Рэспублікі Беларусь, па рашэнні якога праваабаронцу быў абмежаваны выезд за межы Беларусі.
26 чэрвеня праваабаронца патэлефанаваў у канцылярыю суду Цэнтральнага раёна, каб даведацца,ці вызвалілася суддзя Алена Сямак, якая раней не змагла прызначыць дату судовага паседжаньня па прычыне выключнай занятасці. У адказ пачуў, што суддзя Сямак, разам з сакратаркай, знаходзіцца ў адпачынку да 13 ліпеня. Праваабаронца плануе пакінуць запіс у Кнізе скаргаў і прапаноў суда, паколькі згодна з ч.1 арт. 337 ГПК Рэспублікі Беларусь справы, якія ўзнікаюць з адміністратыўна-прававых адносін, разглядаюцца судом не пазней месячнага тэрміну ад дня паступлення заявы ў суд, калі іншае не ўстаноўлена дадзеным Кодэксам і іншымі актамі заканадаўства.
За гэты час Дэпартамент па грамадзянству і міграцыі Міністэрства ўнутраных спраў прызнаў сваю памылку аб унясеньні праваабаронцы Валянціна Стэфановіча ў базу дадзеных грамадзянаў Рэспублікі Беларусь, якім часова абмежаванае права выезду з Рэспублікі Беларусь, спаслаўшыся пры гэтым на тэхнічны збой у базе дадзеных. Аднак Стэфановіч па-ранейшаму не зможа пакінуць межы краіны да завяршэньня праверкі базы дадзеных. Спадзяваньні на судовы разгляд скаргі, як бачна, таксама ілюзорныя.
Нагадаем, што 4 траўня Валянцін Стэфановіч накіраваў на імя старшыні Менскага гарадскога суда заяву пра грубейшае парушэнне заканадаўства з боку суддзі Цэнтральнага раёна Алены Сямак, якая зацягвае разгляд скаргі невыязнога праваабаронцы, на якую атрымаў фармальную адпіску.
11 сакавіка бягучага года пры пераездзе дзяржаўнай мяжы Рэспублікі Беларусь у памежным пераходзе “Каменны лог” Валянціну Стэфановічу было адмоўлена ў праве выезда з Рэспублікі Беларусь. Паводле тлумачэнняў начальніка памежнай службы, пашпартныя звесткі праваабаронцы значацца ў банку дадзеных аб грамадзянах Рэспублікі Беларусь, права якіх на выезд з Рэспублікі Беларусь часова абмежавана.
