У Гарадоцкім раёне пра выбары не ведаюць?
Афіцыйны сайт Гарадоцкага райвыканкама – адзіны з усіх "райвыканкамаўскіх" сайтаў Віцебшчыны, дзе няма інфармацыі пра будучыя парламенцкія выбары. На інтэрнэт-старонках іншых райвыканкамаў з'явіліся цэлыя рубрыкі з указам пра прызначэнне даты выбараў і каляндарным планам. А ў Гарадку пра ўсе гэта нават не згадалі.
Афіцыйны сайт Гарадоцкага райвыканкаму на 23 чэрвеня 2012 году не меў рубрыкі "Выбары-2012", якія амаль адначасова з'явіліся на сайтах калегаў з іншых рэгіёнаў.
Што да іншых выканкамаў, то яны паклапаціліся пра паведамленні для сваіх землякоў у рознай ступені. На большасці інтэрнэт-старонак размешчаны толькі ўказы "Аб прызначэнні выбараў у Савет Рэспублікі Нацыянальнага Сходу Рэспублікі Беларусь пятага склікання" і спісы выбарчых акругаў па Віцебскай вобласці. А вось на сайце Лёзненскага райвыканкаму ёсць і каляндарны план падрыхтоўкі і правядзення выбараў, і ўзоры дакументаў, неабходных для вылучэння ў выбарчыя камісіі.
Ніякіх звестак пра парламенцкія выбары няма і на сайце Наваполацка – горада, дзе ўтворана асобная выбарчая акруга.
23 чэрвеня 2012 года ўсе звесткі пра ўтварэнне выбарчых акругаў на Віцебшчыне надрукавалі абедзьве абласныя газеты – "Віцебскі рабочы" і "Народнае слова".
"Праваабаронцы за свабодныя выбары"
