У Міжнародны дзень барацьбы супраць катаваньняў віцебскі праваабаронца зладзіць пікет
Праваабаронца Павел Левінаў
Заяўку на правядзеньне пікету праваабаронца Павал Левінаў падаў на імя кіраўніка адміністрацыі Першамайскага раёну Віцебску. Пікет, у адпаведнасьці з заяўкай, мусіць адбыцца 26 чэрвеня на рагу праспэктаў Чарняхоўскага і Будаўнікоў абласнога цэнтру. Мэта меркаванага пікету: інфармаваньне грамадзян наконт выконваньня Рэспублікай Беларусь канвэнцыі супраць катаваньняў і іншых лютых, нялюдзкіх або зьневажальных для годнасьці відаў абыходжаньня і пакараньня.
Варта адзначыць, што ў заяўцы Паўла Левінава няма стандартнай для гэткіх заявак фармулёўкі: “Прашу дазволіць”. Па сутнасьці, ён ня просіць дазволу, а паведамляе ўладам, што мае намер зладзіць мерапрыемства. Зладзіць у адпаведнасьці з нормамі, зацьверджанымі канстытуцыяй і міжнароднымі абавязальніцтвамі краіны. Праваабаронца ў сваёй заяўцы цытуе палажэньні артыкулу 23 Канстытуцыі, які дазваляе абмежаваньне правоў і свабодаў асобы толькі ў выпадках, прадугледжаных законам, - у інтарэсах нацыянальнай бясьпекі, грамадзкага ладу, абароны маралі, здароўя насельніцтва, правоў і свабодаў іншых асобаў. Прыпыненая рэалізацыя правоў і свабодаў асобы можа быць толькі ва ўмовах надзвычайнага або ваеннага становішча.
“Для прававой дзяржавы характэрная свабода асобы: дазволена ўсё, што не забаронена законам”, - падкрэсьлівае Павал Левінаў. Ён перакананы, што для таго, каб правесьці “масавае” мерапрыемства, у якім возьме ўдзел толькі адзін чалавек, яму няма патрэбы заключаць дамовы з ЖКГ, міліцыяй і мэдыкамі, як таго звычайна патрабуюць улады. Бо адсутнасьць такіх дамоваў ня згадваецца ў пераліку выпадкаў, у якіх Канстытуцыя і нормы міжнароднага права дапушчаюць абмяжоўваць яго права на публічнае выказваньне сваёй думкі празь пікет.
У заяўцы на пікет праваабаронца пералічае захады, якія ён зробіць для забесьпячэньня грамадзкага парадку і бясьпекі падчас мерапрыемства, мэдычнага абслугоўваньня адзінага ўдзельніка акцыі і прыборкі тэрыторыі. Ён абавязуецца “не парушаць грамадзкі парадак і бясьпеку, не ствараць перашкодаў руху пешаходаў; наглядаць за станам свайго здароўя, пры неабходнасьці своечасова інфармаваць пра наяўныя пытаньні ўстановы аховы здароўя; не засьмечваць месца правядзеньня пікету”.
“У сучаснай прававой дзяржаве асновай прававой сыстэмы зьяўляецца Канстытуцыя, у якой замацоўваюцца агульнапрызнаныя прынцыпы і нормы міжнароднага права. Усе падканстытуцыйныя акты павінны адпавядаць Канстытуцыі і міжнародным абавязальніцтвам дзяржавы”, - адзначае Павал Левінаў у сваёй заяўцы на правядзеньне пікету, адрасаванай чыноўніку раённай адміністрацыі.
