Абласны суд адхіліў скаргу віцебскіх актывістаў наконт забароны акцый ў Дзень Волі
Пасля таго, як гарвыканкам забараніў праводзіць у Дзень Волі щрачыстае шэсце і сход жыхароў Віцебску, актывісты звярталіся ў Кастрычніцкі раённы суд. Але там адхілілі іх скаргу на забарону імпрэзаў намеснікам старшыні Віцебскага гарвыканкаму Уладзімірам Шломам.
Тады каардынатар Руху “За свабоду” ў Віцебскай вобласці Хрыстафор Жаляпаў, Аляксей Гаўруцікаў, які быў даверанай асобай Мікалая Статкевіча на мінулых прэзідэнцкіх выбарах, і сябар КХП БНФ Ян Дзяржаўцаў падалі касацыйную скаргу на рашэнне суду Кастрычніцкага раёну Віцебску. 26 красавіка скаргу разглядала судовая калегія, і суддзі вырашылі пакінуць яе без задавальнення.
Святочныя мерапрыемствы актывісты хацелі ладзіць у двух ранах горада – шэсце на тэрыторыі Чыгуначнага раёну, а сход – на тэрыторыі Кастрычніцкага. У такім выпадку рашэнне наконт дазволу мусіць прымаць гарвыканкам, куды і былі накіраваныя заяўкі. Аднак у гарвыканкаме вырашылі, што арганізатары парушылі заканадаўства пра масавыя акцыі, бо звярталіся не ў раённыя адміністрацыі, і згаданыя месцы ў цэнтры Віцебску – вуліца Леніна і плошча Свабоды – не з ліку тых, што вызначылі мясцовыя ўлады для правядзення масавых акцый.
Актывісты лічаць, што чыноўнікі і суддзі свядома карыстаюцца супярэчнасцямі ў Законе «Аб масавых мерапрыемствах у Рэспубліцы Беларусь» і ў рашэнні Віцебскага гарадскога выканаўчага камітэту «Аб масавых мерапрыемствах у горадзе Віцебску», дзе вызначаны месцы для правядзення імпрэзаў.
