Баранавічы: грамадскія актывісты павіншавалі Статкевіча-старэйшага з Вялікаднем

Баранавіцкія грамадскія актывісты наведалі Віктара Паўлавіча Статкевіча – бацьку экс-кандыдата ў прэзідэнты Мікалая Статкевіча. Госьці найперш павіншавалі Статкевіча-старэйшага з Вялікаднем, пажадалі моцнага здароўя, пачаставалі яго вялікоднымі стравамі і пажадалі найхутчэйшай сустрэчы з сынам Мікалаем.

За кубачкам гарбаты гаварылі пра вызваленне Андрэя Саннікава і Зміцера Бандарэнкі, пра магчымыя вызваленні астатніх. Статкевіч-старэйшы вельмі перажывае, што Мікалай некалькі месяцаў знаходзіўся ў камеры з хворым на сухоты, што цяперашні яго сукамернік – былы афіцэр спецназу. Разам прачыталі вялікоднае віншаванне Мікалая, дасланае бацьку. Дарэчы, ён паведамляе, што апошні ліст да бацькі яму вярнулі назад і паведамілі, што пісьмо не прайшло цэнзуру з-за “цынічных” выказванняў. Мікалай Статкевіч паведамляе ў вялікоднай паштоўцы, што некалькі разоў перачытваў гэты ліст, але так і не знайшоў там цынічных меркаванняў.