Арышт аўтамабіля прызнаны незаконным
У канцы сакавіка супрацоўнікі ДАІ на трасе М1 “Масква – Брэст” затрымалі аўтамабіль, які перавозіў 10-тысячны тыраж газеты “Віцебскі кур'ер”. Гэта выданне так і не змагло атрымаць згоду ні адной з беларускіх друкарняў, а таму друкуецца ў расійскім Смаленску.
Акрамя канфіскацыі накладу газеты, якая стала ўжо традыцыйнай, супрацоўнікі ДАІ арыштавалі аўтамабіль і накіравалі яго на штрафстаянку ў Дуброўна. Супрацоўнікі рэдакцыі палічылі такія дзеянні незаконнымі і звярнуліся ў суд. Як аказалася, небезвынікова. На днях суд Дубровенскага раёна палічыў арышт аўтамабіля, у якім перавозілі апошні з затрыманых тыражоў «Віцебскага кур'ера», незаконным. Як паведаміў праваабаронца Павел Левінаў, які прысутнічаў на пасяджэнні, аўтамабіль «свабодны» і супрацоўнік рэдакцыі змог забраць яго са штрафстаянкі.
У ходзе працэсу Дубровенскія аўтаінспектары спасылаліся на нібыта неаплачаныя з 2009 года штрафы, хоць як было ўстаноўлена судом, усе яны былі аплочаныя.
