Веткаўскіх падлеткаў выхоўваюць праз ЛТП
фота belapan.com
Веткаўская камісія па справах непаўналетніх спрабуе выхоўваць, якія стаяць на ўліку за здзейсненыя правапарушэнні, праз установы пенітэнцыярнай сістэмы. У мінулым годзе веткаўскія міліцыянеры разам з педагогамі звазілі «цяжкіх» падлеткаў на экскурсію ў калонію-пасяленне. Цікава, як выказалася пра паездку сацыяльны педагог школы: «Каб даражыць свабодай – трэба пабываць у няволі». «Пасля экскурсіі дзеці вырашылі, што ў калонію яны наўрад ці вернуцца», - з задавальненнем адзначалася ў публікацыі мясцовай газеты «Голас Веткаўшчыны».
Але, відаць, экскурсія ў калонію не паўплывала на зніжэнне ўзроўню падлеткавай злачыннасці ў раёне, таму ў 2012 годзе дарослыя вырашылі звазіць «цяжкіх» падлеткаў на экскурсію ў лячэбна-працоўны прафілакторый ў Светлагорску. «Гэта паездка дзецям, якія стаяць на ўліку ў інспекцыі па справах непаўналетніх, запомніцца надоўга», - адзначае ў справаздачы карэспандэнт раённай газеты.
«Калі мы зайшлі на тэрыторыю, то за намі з лязгам зачыніліся металічныя вароты. Пазней падлеткі прызналіся, што ў той момант у многіх з іх па спіне прабег халадок», - паддае экспрэсіі журналіст.
Ён піша, што ў ЛТП ёсць і медыцынская частка. «Вось толькі некаторых пастаяльцаў прыходзіцца прывязваць, бо вельмі яны актыўныя ў сваіх паводзінах. Пры неабходнасці яны могуць знаходзіцца прывязнымі не адзін дзень, а двое-трое сутак», - адзначае аўтар публікацыі.
Карэспандэнту чамусьці весела, і ён марыць: «Няблага было б у ЛТП пабачыць «каня». «Конь» - гэта алкаголік, які знаходзіцца ў стане «белай гарачкі». Для такіх кліентаў ёсць адзіночныя камеры без святла», - тлумачыць журналіст, які, напэўна, ніколі не чуў, што «дэлірый» - гэта захворванне, а прывязваць людзей, здзекавацца з іх і прыніжаць іх – парушэнне іх правоў. Яшчэ аўтара артыкулу ўразіў непрыемны пах у прафілакторыі. «Хаця што тут здзіўляцца – лазнева-пральны камбінат працуе толькі адзін раз на тыдзень», - заўважае супрацоўнік рэдакцыі.
І завяршаецца артыкул задавальненнем дарослага чалавека ад таго, што дзяцей здолелі напалохаць:. «У аўтобусе я звярнуў увагу на падлеткаў – запалоханы былі ўсе!».
