Дырэктар гандлёвага цэнтру западозрыў прадпрымальніцу ў арганізацыі палітычнага страйку
Магілёўская міліцыя не прызнала факту хлуслівага даносу ў КДБ дырэктарам гандлёвага цэнтру “Прэстан”. У пісьмовым адказе міліцыі ў дзеяннях спадара Пашурына адсутнічае склад правапарушэння.
Нагадаем, што магілёўская прадпрымальніца Людміла Крыловіч прасіла прыцягнуць да адказнасці дырэктара ГЦ “Прэстан” спадара Пашурына, які паведаміў у КДБ што яна рыхтуе палітычны страйк.
Пасля гэтага выпадку да Людмілы патэлефанаваў чэкіст, які назваўся Андрэем Іванавічам і прапанаваў сустрэцца. Сустрэча адбылася на працоўным месцы прадпрымальніцы. Супрацоўнік спецслужбаў узяў пісьмовыя тлумачэнні ў жанчыны і спраўдзіў наяўнасць у яе дамовы на арэнду і папрасіў узяць копіі.
“Падчас сустрэчы з Андрэем Іванавічам я адзначыла, што ніякага страйку я не рыхтую, а дырэктар “Прэстана” на фоне асабістай непрыязні не жадае працягнуць са мной дамову арэнды, - гаворыць Людміла Крыловіч, - Таксама я патлумачыла чэкісту, што існуе парушэнне заканадаўства ў дзеяннях арэндадаўцы. Праз тыдзень я яму патэлефанавала і спытала, як ідзе разбіральніцтва, аднак ён адмовіўся мне даць які-небудзь адказ, таму я і вырашыла звярнуцца ў міліцыю пісьмова”.
Нагадаем, што з Людмілай Крыловіч не працягнули дамову на арэнду плошчы ў гандлёвым цэнтры “Прэстан”. У жніўні мінулага году на жаданне ўласніка будынка закрыць яго на рамонт і пазбавіць усіх прадпрымальнікаў працоўных месцаў жанчына арганізавала страйк. Інфармацыя пра гэта выйшла за межы цэнтра і дайшла да ўлады, якая гарантавала, што прадпрымальнікі “Прэстана” будуць працаваць і надалей. 30 лістапада Людміла Крыловіч атрымала ўведамленне, у якім было сказана, што дамова арэнды з ёй перазаключацца не будзе.
