Бабруйчаніна Станіслава Кавалеўскага папярэдзілі пра адказнасць за ўдзел у мітынгах
Да актывіста Беларускай сацыл-дэмакратычнай партыі (Грамады) завітаў старэйшы ўчастковы апорнага пункту аховы правапарадку №14 маёр Раман Коўрык. Свой візіт міліцыянт зладзіў вечарам 23 сакавіка.
Міліцыянт папярэдзіў Станіслава пра адказнасць за ўдзел у несанкцыяваных мерапрыемствах і верагодных мітынгах, якія могуць адбыцца 25 сакавіка ў Бабруйску і Менску.
“На мае пытанні маёр Коўрык ніяк не рэагаваў. Я спрабаваў у яго дазнацца, што гэта за дата 25 сакавіка і ці санкцыяваны мітынг у Менску, аднак так і не атрымаў ад яго адказаў”, - кажа Станіслаў Кавалеўскі.
Трэба адзначыць, што 22 сакавіка на бабруйскай сядзібе Аб’яднанай Грамадзянскай партыі адбылася вечарына, прысвечаная чарговай гадавіне ўтварэння Беларускай Народнай Рэспублікі. На гэтай вечарыне Станіслаў Кавалеўскі выступаў з дакладам пра ролю Бабруйска і бабруйцаў у працэсе ўтварэння першай незалежнай беларускай дзяржавы.
