Магілёўскі маляр Аляксей Паўлоўскі судзіцца з “Прамжылбудам” (відэа)
Аляскей Паўлоўскі
Ад свайго былога працадаўцы Аляксей Паўлоўскі праз суд хоча дамагчыся змянення фармулёўкі яго звальнення.
Ён адзначае, што змененая фармулёўка ў працоўнай кніжцы дасць яму магчымасць атрымаць выхадную дапамогу. Гэта сума, з улікам трох сярэднямесячных заробкаў і двухтыднёвай выхадной дапамогі, складае каля 11 мільёнаў рублёў.
“Суд мусіць адбыцца 28 сакавіка. Суддзя Кастрычніцкага суда Аляксандр Раманаў ужо правёў закрытае суразмоўе са мной і прадстаўніком “Прамжылбуда”. Раманаў прапанаваў мне канкрэтызаваць мой пазоў, каб на яго да дня суда “Прамжылбуд” здолеў нешта адказаць”, - кажа Аляксей Паўлоўскі.
Ён распавёў, што хочуа, каб ў яго працоўнай кніжцы быў зменены артыкул Працоўнага кодэкса, які былы працадаўца ўказаў пры звальненні.
“Прычынай гэтаму з’яўляецца грубае парушэнне тэхнікі бяспекі наймальнікам. У мяне ёсць усе доказы гэтаму. На працы няма рукамыйнікаў для працоўных, няма агароджаў і лесвіц. Людзі працуюць без касак і страховачных паясоў. Усё гэта заснята карэспандэнтамі БТ. У гэтым годзе на будоўлі загінуў чалавек і некалькі было паранена”, - адзначае маляр пятага разраду.
Нагадаем, што як сябра незалежнага прафсаюза РЭП Аляксей Паўлоўскі актыўна змагаўся за паляпшэнне ўмоваў працы. 10 лютага адміністрацыяй будаўнічай арганізацыі з ім не працягнула працоўны кантракт. Перад звальненнем Паўлоўскага ўся брыгада, у якой працаваў прафсаюзны актывіст, у знак салідарнасці з ім падпісала заяву пра калектыўнае звальненне. Аднак, пад ціскам адміністрацыі, працоўныя былі вымушаны адклікаць свае подпісы.
