Уладзімір Малей прысвяціў свой марафонскі забег патрабаванню свабоды Алесю Бяляцкаму (фота)

Сярод удзельнікаў першага сёлетняга міжнароднага лёгкаатлетычнага прабегу ў Гомелі ў плямістых і чырвона-зялёных касцюмах праваабаронца з Брэста вельмі адрозніваўся - ён быў у майцы “Свабоду Бяляцкаму!” з выявай кіраўніка Праваабарончага цэнтра “Вясна”.   

Таксама падчас забегу Уладзімір Малей трымаў у руках сцяг беларускага незалежнага прафсаюза РЭП, дзе выконвае ролю прававога інспектара па Брэсцкай вобласці.

Забег быў на дыстанцыі пяць і дзесяць кіламетраў. Аматар марафонскага бегу Малей выбраў даўжэйшую дыстанцыю і годна яе пераадолей: трапіў у пяцёрку лепшых, абагнаўшы некаторых маладых байцоў унутраных войскаў, якія адважыліся толькі на 5-кіламетровую дыстанцыю. Іх забег быў прысвечаны 94-ай гадавіне ўнутраных войскаў.

Удзельнікі мерапрыемства падыходзілі да Уладзіміра Малея і распытвалі пра Бяляцкага, які зараз знаходзіцца ў калоніі №2 у Бабруйску.

Праваабаронца лічыць, што мэты пашырэння інфармацыі - пра наяўнасць у Беларусі палітзняволеных, сярод якіх і Алесь Бяляцкі, які пераследуецца за сваю праваабарончую дзейнасць, - падчас марафону яму дасягнуць удалося.