Віцебскую актывістку аштрафавалі за салідарнасць з Сяргеем Каваленкам
Акцыя Алены Семенчуковай у падтрымку Сяргея Каваленкі
Алена Семенчукова, актывістка "Еўрапейскай Беларусі", выйшла ў цэнтр гораду з плакатам "Свабоду Сяргею Каваленку". Яе затрымалі, склалі пратакол за парушэнне заканадаўства аб вулічных акцыях ды завезлі ў суд.
Суддзя Чыгуначнага райсуду Алена Цыганкова аштрафавала Алену Семенчукову, за правядзенне несанкцыянаванай акцыі. Штраф памерам 175 тысяч рублёў дзяўчына збіраецца аспрэчыць.
"Алена не адмаўляла таго, што выйшла з плакатам на знак салідарнасці з палітвязнем Сяргеем Каваленкам, які зараз знаходзіцца ў мінскай турме і трымае галадоўку. Але дзяўчына не прызнала сваёй віны: сказала, што не парушала заканадаўства, а выкарыстоўвала сваё права на свабоду выказвання ўласных перакананняў", - распавёў праываабаронца Павел Левінаў.
