У Брэсце збіраюць грошы ў падтрымку сям’і Сяргея Каваленкі
Сяргей Каваленка пасля працяглай галадоўкі
З ініцыятывай матэрыяльна дапамагчы сям’і віцебскага сябра КХП-БНФ, які ўжо больш за два месяцы трымае галадоўку за кратамі, выступілі ягоныя брэсцкія аднапартыйцы. Аднак непасрэдна ў зборы сродкаў бяруць удзел таксама прадстаўнікі грамадскіх арганізацый і незалежныя журналісты.
За сабраныя грошы мяркуецца падтрымаць жонку і дзяцей Каваленкі, якія апынуліся ў цяжкім матэрыяльным становішчы.
Раней брэсцкія прадстаўнікі дэмакратычнага руху распачалі сумесныя малітвы за выратаванне жыцця Сяргея Каваленкі. Падчас багаслужэнняў яны жадаюць яму ўмацавання сіл і здароўя, але разам з тым моляцца за тое, каб Сяргей спыніў галадоўку, бо сваімі паводзінамі ён ужо пераканаў усіх, што моцны духам і не зломлены выпрабаваннямі, якія давялося перажыць.
