Аршанскі РАУС з доктарам Сайковым прымусова кадуюць ад алкагалізму
На днях мясцовай “Аршанскай газеце” даў прымеркаванае да Дня міліцыі інтэрв'ю начальнік Аршанскага РАУС Леанід Міхайлаў. Сярод іншага ў заслугі Аршанскага райаддзела ён паставіў поспехі ў барацьбе з п'янствам і алкагалізмам, не пасаромеўшыся расказаць пра тое, якім чынам гэтая самая барацьба вядзецца.
Аказалася, аршанская міліцыя практыкуе прымусовае кадаванне ад алкагалізму з дапамогай доктара-псіхатэрапеўта Дзмітрыя Сайкова. Збіраюць людзей, якія п'юць, з усяго сельсавета, прывозяць у адзін з дамоў культуры, дзе Сайкоў за сціплыя 550000 з чалавека ажыццяўляе свой гаючы сеанс. Нядаўна 75 чалавек прайшлі кадаванне ў Забалоцкім ДК.
Аршанскія ж праваабаронцы звяртаюць увагу на тое, што прымусовае аказанне платнай медыцынскай працэдуры з'яўляецца парушэннем правоў чалавека, якімі б добрымі мэтамі яно не было апраўдана.
