У Гародні “Пагоню” адстаялі

Змаганне за права наклеіць выяву “Пагоні” на бакавыя шыбы сваёй уласнай машыны гарадзенец Руслан Пецько пачаў яшчэ летам мінулага году. Тады, 20-га ліпеня, яго выклікалі з працоўнага месца супрацоўнікі гарадзенскага ДАІ за нібыта няправільную паркоўку машыны. Пасля прапанавалі праехаць у аддзел міліцыі, бо службоўцы палічылі, што ў наклейванні выявы беларускага герба “Пагоня” на шыбах прыватнага аўтамабіля Руслана Пецько ёсць нейкае парушэнне. А ўжо там супрацоўнікі міліцыі загадалі Руслану зняць сімволіку, якую яны самыя насілі на сваіх мундзірах на пачатку 90-х гадоў.

Руслан не пагадзіўся з такой вольнай інтарпрэтацыяй і стаў аспрэчваць дзеянні міліцыі. І хоць тады беларуская сімволіка была прымусова знятая з яго аўтамабіля, зараз ён атрымаў ліст з Упраўлення ўнутраных спраў Гарадзенскага аблвыканкаму, дзе было сказана наступнае: “ Паведамляю, што па факту размяшчэння Вамі налепак у Вашым самаходзе з выявай вершніка на чырвона-белым фоне, АУС праверка спынена на падставе п.1 ч.1 арт.9.6. ПВКаАП Рэспублікі Беларусь (адсутнасць факту адміністрацыйнага парушэння, як абставіны, якая выключае адміністрацыйны працэс). Канфіскаваныя плакаты з выявай вершніка на бела-чырвоным фоне Вы можаце забраць у стале знаходак АУС адміністрацыі Ленінскага раёна Гародні”.

Зараз Руслан смела ездзіць з выявамі “Пагоні” і возіць на ўсялякі выпадак з сабой гэтае рашэнне з Аддзела ўнутраных спраў.