У Магілёве запалохваюць людзей, каб зменшыць колькасць зваротаў

Пра гэта паведамляе грамадскі актывіст Аляксей Паўлоўскі.
“Некалькі месяцаў таму я пісаў ліст на імя кіраўніка гораду Станіслава Барадаўкі з патрабаваннем добраўпарадкаваць падыход да паліклінікі №7, - гаворыць Аляксей Паўлоўскі. - Людзі ідуць ад прыпынку грамадскага транспарту тралейбусу №2 спатыкаючыся і па бруду. Быў вядомы выпадак, калі супрацоўніца гэтай паліклінікі павалілася і зламала сабе руку”.
Аляксей адзначае, што кіраўнік гораду ў тэлефоннай размове падчас прамой лініі сказаў, што не трэба людзям увогуле хадзіць праз гэты прыпынак – хай абыходзяць.
“Пад маім зваротам падпісалася болей за сто чалавек, але, як мне паведамілі медыкі, якія падпісаліся, іх усіх выклікаў галоўны лекар паліклінікі спадар Зарубайка і ў грубай форме пагражаў ім за тое, што яны зрабілі. Я лічу, што праз пагрозы нашых мясцовых чыноўнікаў у людзей адбіваюць ахвоту адстойваць свае правы”, - адзначае Аляксей Паўлоўскі.