Суд задаволіў скаргу Мікалая Уласевіча
Грамадска-палітычны актывіст Мікалай Уласевіч
Досыць нечакана скончыўся разгляд скаргі астравецкага грамадскага актывіста Мікалая Уласевіча, якая разглядалася 2 лютага ў судзе Ленінскага раёну Гародні. Працэс доўжыўся каля паўтары гадзіны і ў выніку суддзя Віталь Ляцко задаволіў пазоў Уласевіча.
Цікава, што паралельна аналагічная скарга Уласевіча на дзеянні Астравецкай раённай адміністрацыі, у прыватнасці старшыні райвыканкаму Адама Кавалько на бягучым тыдні будзе разглядацца ў Генеральнай пракуратуры Рэспублікі Беларусь. Але фактычна ўжо зараз можна казаць пра тое, што супраць кіраўніка Астравецкага райвыканкаму павінна быць пачатая крымінальная справа. І менавіта таму, што суд Ленінскага раёну Гародні задаволіў скаргу Уласевіча і адмяніў пастанову аб адмове ва ўзбуджэнні крымінальнай справы ў дачыненні да старшыні райвыканкаму Адама Кавалько, якая была вынесена абласным упраўленнем унутраных спраў яшчэ 4 траўня 2011 году.
2 лютага Мікалай Уласевіч выклаў пры разглядзе скаргі дадатковыя факты і аргументы. Цікава, што ў суд не былі прадстаўлены матэрыялы з абласнога УУС, не з’явіўся на разгляд скаргі і яго прадстаўнік, таму старшы пракурор абласной пракуратуры слушна прапаноўваў запатрабаваць патрэбныя матэрыялы. Але суддзя Ляцко адхіліў гэтае хадайніцтва і задаволіў скаргу без дадатковага вывучэння матэрыялаў. Незалежныя назіральнікі мяркуюць, што такое, досыць сенсацыйнае рашэнне суду, вельмі верагодна было прынятае пасля ўзгаднення з “вышэйшымі інстанцыямі”. Як будуць разгортвацца падзеі далей вакол карупцыйнай справы астравецкага чыноўніка – пакажа час.
