Праваабарончая праграма “Людзьмі звацца!” на Радыё Рацыя

Кожны аўторак у 15:05 ў эфіры незалежнай радыёстанцыі “Радыё Рацыя” - праграма “Людзьмі звацца!”, якая асвятляе падзеі, датычныя правоў чалавека на Беларусі. Праграма складаецца з рубрык “Хроніка пераследу”, "Падзея тыдня", “Асоба. Дзяржава. Грамадства” ды “Праваабарончы каляндар”.
У гэтым выпуску:
Найбольш гучныя факты парушэнняў правоў чалавека за мінулы тыдзень - у “Хроніцы пераследу”.
У рубрыцы “Падзея тыдня” – завяршэньне кампаніі па зборы сродкаў для зняволенага старшыні праваабарончага цэнтру «Вясна» Алеся Бяляцкага,  якая найперш засведчыла небывалы ранней уздым салідарнасці і кансалідацыі ў беларускім грамадстве.

Госцем рубрыкі “Асоба. Дзяржава. Грамадства” стаў юрыст Выканаўчага бюро Асамблеі НДА Юрый Чавусаў. Падчас брыфінгу, прысьвечанага прэзентацыі штогадовага маніторынгу сітуацыі са свабодай асацыяцый размова ішла пра абмеркаваньне шматлікіх адмоваў у рэгістрацыі палітычным партыям, грамадскім ды рэлігійным аб’яднаньням.
У “Праваабарончым календары” – Дзень дысідэнта, які адзначаецца 22 студзеня. Менавіта ў гэты дзень у 1980-ым годзе ў Маскве быў арыштаваны і сасланы ў горад Горкі выбітны акадэмік, дысідэнт і праваабаронца Андрэй Сахараў.У музычных паўзах – песьні гурта “Рокаш”.