Сяргея Каваленку ў СІЗА кормяць гвалтам
Сяргей Каваленка ў судзе
Жонцы віцебскага актывіста Алене Каваленка не растлумачылі, якая працэдура прымусовага кармлення. Яна лічыць, што гэта катаванні – калі чалавека ў стане палітычнай галадоўкі пачынаюць карміць гвалтам праз зонд. Яна цвердзіць, што муж свае галадоўкі пратэсту не спыняў, і не выключае, што яго кормяць праз зонд прыкутым да ложка.
Ад начальніка медычнай часткі віцебскага СІЗА жонцы зняволенага сябра КХП БНФ нічога даведацца не ўдалося:
"Я спытала: "Як гэта робіцца? Можа, там Сяргей у кайданках да ложка прыкуты? Але ён мне сказаў толькі "праз зонд пераральна". Нічога не сказаў ці не захацеў казаць. Але я лічу, што афіцыйна галадоўка працягваецца, бо прымусовае кармленне – гэта гвалт! Яшчэ я спытала, чым кормяць праз зонд. Адказаў лекар, што булёнам мясным. Я чытала, што гэта цяжкая ежа для чалавека, які адгаладаваў 30 дзён. Але сокі для Сяргея ў мяне не прынялі".
Алена Каваленка і маці зняволенага Лідзія Каваленка атрымалі сёння чарговыя адмовы на спатканні з Сяргеем. У афіцыйнай паперы, падпісанай Сяргеем Волкавым, следчым па крымінальнай справе, распачатай супраць актывіста, напісана проста: спатканне ён лічыць немэтазгодным.
Супраць Сяргея Каваленкі распачалі крымінальную справу за парушэнне рэжыму адбывання ўмоўнага пакарання – "хатняй хіміі", прысуджанай сябру КХП БНФ за вывешванне бел-чырвона-белага сцяга на навагодняй елцы ў Віцебску 7 студзеня 2010 году. На знак пратэсту ён абвясціў галадоўку, якая працягваецца ўжо 30 дзен.
