Палітвязні напісалі бярозаўчанам
Бярозаўскія актывісты атрымалі адказы на віншаванні ад палізняволеных Алеся Бяляцкага і Зміцера Дашкевіча.
Алесь Бяляцкі выказаў падзяку не толькі за навагоднія і Калядныя віншаванні, але і за спачуванні з нагоды смерці бацькі. Ён вельмі перажывае, што не змог быць на пахаванні бацькі. Але, як піша праваабаронца, “жыццё ідзе. У турме шмат пабытовых спраў, таксама патрэбна адказаць на лісты, якіх прыходзіць шмат. Так праходзяць дні”. Алесь Бяляцкі спадзяецца на станоўчы перагляд ягонай касацыйнай скаргі 24 студзеня. Таму развітваецца словамі “да сустрэчы”.
Зміцер Дашкевіч таксама дзякуе за віншаванні і падтрымку. І заканчвае сваё віншаванне словамі святога Пісання: “Чаго вока не аглядала, ані вуха не чула, ані ўваходзіла ў сэрца чалавечае, тое Бог прыгатаваў тым, што любяць яго”.
