Ідэолагі Магілёўшчыны рэкамендуюць раёнкам перайсці на штотыднёвы выпуск
Начальнік упраўлення ідэалагічнай работы Магілёўскага аблвыканкама Андрэй Кунцэвіч прапанаваў раённым газетам Магілёўскай вобласці перайсці на штотыднёвы выпуск. Як паведаміў інтэрнэт-сайт Быхаўскай раённай газеты “Маяк прыдняпроўя”,” такі варыянт падвышэння цікавасці жыхароў рэгіёна к мясцовай прэсе быў агучаны на прэс-канферэнцыі па выніках сацыяльнага развіцця Прыдняпроўскага края за 2011 год”.
Андрэй Кунцэвіч выказаў меркаванне, што «Если районное издание выходит 2 раза в неделю в объеме 4 плюс 8, то одноразовый выпуск должен составить порядка 12 страниц. Читателю намного приятнее получить серьезную многостраничную газету, пусть и реже».
Як стасуецца настойлівая прапанова галоўнага ідэолага Магілёўскай вобласці з міфам аб хоць якой-небудзь незалежнасці мясцовай прэсы ад улады, абсалютна незразумела. Між тым дэ-юрэ ўсе раённыя газеты з’яўляюцца самастойнымі суб’ектамі гаспадарання і маюць права вызначаць перыядычнасць выхаду самі. Незразумела таксама, чаму раёнкам рэкамендуецца пераходзіць на штотыднёвы выпуск з мэтай падвышэння папулярнасці, бо на той жа прэс-канферэнцыі Андрэй Кунцэвіч распавёў пра дасягненні мясцовай прэсы Магілёўскай вобласці:
«Могилевские областные, городские, районные издания получили тираж 124 тыс. экземпляров, или 106% к уровню прошлого года, — паведаміў Андрэй Кунцэвіч. — Это в 2 раза превышает совокупный подписной тираж основных республиканских газет, что красноречиво свидетельствует об устойчивой популярности местных СМИ среди населения».
Між тым апытаныя журналісты раённых газет у асноўным выказалі адмоўнае стаўленне да ініцыятывы магілёўскіх ідэолагаў. Амаль усе баяцца скарачэння колькасці падпісчыкаў у сувязі са зменай перыядычнасці выхаду газет і змяншэння даходаў ад рэкламы.
Аб якой аб’ектыўнасці і непрадузятасці рэгіянальнай прэсы на Магілёўшчыне можна казаць, калі ёй без усялякага сораму “кіруюць” ідэолагі…
І хто гэта ведае лепей за Андрэя Кунцэвіча, які з’яўляецца прафесійным журналістам і да перахода на “ідэалагічную працу” не адзін год адпрацаваў у бялыніцкай раённай газеце “Зара над Друццю”…
