Сёньня чацьвёрты дзень судовага працэсу над актывістамі “Партнэрства”
Чацьвёрты дзень каля будынку суду Цэнтральнага раёну зьбіраюцца людзі на знак салідарнасьці з арыштаванымі актывістамі незарэгістраванай арганізацыі “Партнэрства”. Эніру Браніцкую, Міколу Астрэйку, Цімафея Дранчука й Аляксандра Шалайку абвінавачваюць у кіраваньні арганізацыяй, якая парушае правы й інтарэсы грамадзянаў. Ад 21 лютага іх трымаюць пад вартай. Суд праходзіць за зачыненымі дзьвярыма. Сёньня апыталі ўсіх сьведак і прагледзелі пісьмовыя матэрыялы крымінальнай справы. Людзі, якія сабраліся на вуліцы, чакалі зьвестак пра выступ прадстаўніка дзяржабвінавачаньня.
Нягледзячы на моцны дождж, каля будынку суду зноў сабраліся сваякі й паплечнікі актывістаў “Партнэрства”. Сьведкі пасьля таго, як іх апыталі, выходзілі да натоўпу й распавядалі, што адбываецца ў судовай залі. Арыштаваныя Эніра Браніцкая, Мікола Астрэйка, Цімафей Дранчук і Аляксандар Шалайка, калі адказвалі на пытаньні альбо пыталіся самі, уставалі – каб убачыць праз вакно людзей на вуліцы, што махалі ім рукамі.
Маці Міколы й Эніры, Яўгенія Астрэйка й Віялета Браніцкая, стаялі каля суду ад самай раніцы, пад парасонамі, гаворыць Радыё Свабода. Каб іх маглі бачыць дзеці, жанчыны змушаны былі стаць на прыступку на вуліцы Багдановіча. На вуліцы – інтэнсіўны аўтамабільны рух, лужыны, і кабет увесь час абпырсквалі вадой машыны.
Ірына Казуліна прыйшла да суду, каб выказаць падтрымку сваякам арыштаваных актывістаў “Партнэрства”.
Актывіст незарэгістраванага Маладога Фронту Зьміцер Хведарук зьявіўся да суду разам са сваімі партнэрамі з іншых моладзевых арганізацый. Ён паведаміў “Свабодзе”, што прыйшоў сюды прадэманстраваць салідарнасьць з арыштаванымі актывістамі “Партнэрства”.
Сваякі арыштаваных Эніры Браніцкай, Міколы Астрэйкі, Цімафея Дранчука й Аляксандра Шалайкі маюць пэўнасьць: пасьля выступу пракурора ўжо стане больш зразумела, якую пазыцыю зойме суд.
Да абеду заслухалі паказаньні сьведак, а пасьля перапынку судзьдзя Леанід Ясіновіч зачытаў паказаньні тых, хто ня змог прыйсьці на суд. Ён выказаў просьбу да ўдзельнікаў працэсу падрыхтавацца да спрэчак.
Першым мусіць выступіць прадстаўнік дзяржабвінавачаньня.
