Барысаў: З дэмактывістам міліцыянт правёў прафілактычную размову на даму
Сёння ў хаце дэмакратычнага актывіста, сябра Аб'яднанай грамадзянскай партыі, зборшчыка подпісаў за правядзенне Народнага сходу Мікалая Ільюшонка з'явіўся няпрошаны госць - лейтэнант Барысаўскага РУУС Зянькоў.
Яшчэ да навагодніх святаў Мікалаю Ільюшонку тэлефанавалі з Барысаўскага РУУС і прасілі з'явіцца “для гутаркі”. “Я сказаў, - распавядае Мікалай, - што ў міліцыю прыйду толькі па позве. Парадак яны не дасылалі, затое сёння з'явіўся лейтэнант Зянькоў. На маё пытанне, чым выкліканы гэты візіт, міліцыянт пачаў адказваць нешта невыразнае, маўляў, выконвае распараджэнне начальства і прыйшоў для правядзення прафілактычнай гутаркі".
“Прафілактыка”, варта адзначыць, была даволі дзіўнай. Міліцыянт задаваў цалкам канкрэтныя пытанні: у якіх грамадскіх арганізацыях лічыцца Мікалай Ільюшонак, ці прымаў ён удзел у Народным сходзе ў кастрычніку мінулага года, ці існуе ў Барысаве аргкамітэт сходу і хто ў яго ўваходзіць.
«Гутарка» доўжылася каля паўгадзіны. «Уражанне ад такой «прафілактыкі» даволі дзіўнае, - растлумачыў Мікалай. - Міліцыя павінна займацца прафілактыкай правапарушэнняў і злачынстваў. Маю дзейнасць ні да першага, ні да другога аднесці нельга».
